萬般就係命

 

姊妹就係姊妹，吾老妹輒輒同𠊎講:
「𠊎就單淨你一個阿姊，𠊎毋對你好，𠊎愛對麼人好呢？」
故所，佢有麼个好東西，定著會留分𠊎。𠊎一生人伸手接收厥个好料，罕得𠊎有東西同佢分享。

上禮拜六、日，難得老妹婿對台南駛車載佢兩子哀共下轉外家。喊在通霄个𠊎兩公婆過去頭份打嘴鼓，毋過，堵著這滿家官入院愛醒毋醒个關頭，𠊎兩公婆根本無心性過去談哆。單淨拜日該當晝，看了加護病房个家官，就直接載等家娘同妹仔共下轉頭份外家食晝，停跎無兩點鐘黏時又轉通霄屋下。當然，拿等老妹食摎著有个、無个，連眼霜、除皺霜這兜等路轉來。

𠊎想，人生天注定:吾老妹生來就有「布施」厥手足个情分，就乜像吾家官一生人就愛受厥身邊親人个照顧較多共樣个道理——萬般就係命。

講著這滿，吾家官三度「水腦」手術，包尾在台中榮總加護病房戴咧會四禮拜哩，雖然拈轉一條命，毋過重症殘障洗腎患者，還過氣切者，需要呼吸照護病床个長照中心正有辦法收留佢這種慢性病患者个護理。

前兩日跈等吾老公行透透苗栗市、苑裡鎮相關「護理之家」，除忒心力交瘁，還正經想愛大噭一場，因爭，一位難求，通棚愛先登記，等待通知。價數另外毋管，該病房環境實在無理想。還有，病人个生活品質全全無，家屬乜還愛「盡人事」，呵！係講無堵著，你實在無法度理解這人生生死交關个問題。

再過講吾老公可能為著煩勞阿爸安置个問題，拜日開始「飯匙骨下背个腹肌抽筋」，痛到愛收厥个命樣仔，照X光，連小腸就影響到糾一團。注咧一笐射，拿咧一星期个藥仔，正漸漸來恢復，無斯痛到喊阿姆哀喲。

做餔娘个𠊎，心肝肚乜親像深井个十五隻水桶——七上八下啊！𠊎一直相信:天公爺會痛惜有孝个子弟，較艱苦乜會圖過。

▲BACK