過日仔

【文／陳淑芳（現任客語老師／臺北市民生國中退休的國文老師）】

 

2013/1/15（六）打早先去林口接細老弟，轉到珊珠湖大老弟个屋下吂到8:00。

吾老公幾下隻月無「三缺一」，分佢過願一下，係做餔娘儕𠊎个功德。雖然，𠊎惱死賭徼這件事，毋過，吾老弟同吾老公就恁有興頭對這件𠊎惱得死个事齣。算哩！人生有幾多春秋？你還伸著幾多好年光？一抹煞人間大事細事愛自愐自解：尊重各儕个人權，大人大種自家做事自家當，無放火㓾人危害公眾，𠊎就詐無看著就好。

𠊎同大老弟心臼共下料理食晝摎食夜，有徼好賭个人儘採食儘採飽，𠊎兩儕還當認真燜糯飯、煮雞酒分大家齕，當然出發點係顧自家个肚屎，順續仔分佢兜食定定。

下晝頭，大老弟（兩日就無上牌桌）陪𠊎去探望春枝叔姆，佢發蛇（帶狀皰疹）在頭那、額頭个位所，既經兩隻月久還吂好俐，實在還艱耐！這艱苦𠊎四十歲邊仔就擔過，該央時，開學初九月哩，旋風右片頸根耳公下背親像分弄毛蟲仔延著共樣，紅紅腫腫痛到堵毋著咧，正去看皮膚科，誤著黃金治療期。無常識，還親信朋友个秘方亂膏藥仔，這下永久留仔一個痕跡。

阿叔姆一溜哩來就恁有活力、即靈、身體健，七十七歲咧還騎歐-到-拜遛上遛下，這兩個零月个病痛，害佢一下嗄變「老伯姆」咧！𠊎接目看著叔姆該下，心肝肚正經著一大驚。「好漢就驚病來磨」啊！

該暗晡轉通霄屋下，入門看著印傭阿蘭掌等兩老恬恬在廳下看電視，這天寒地凍个時節，一大堂屋三儕人恬肅肅仔，歸下糾到襖袍裡背，坐等分電視看，抑係看電視个畫面，敢係日後个寫照？

 

第二朝晨，𠊎去看吾爸个中學同學張阿叔兩公婆，張叔姆受肝癌个拖挷幾下年，生活做盡愛靠外勞照顧，今晡朝晨外勞去身體檢查無在屋下。張阿叔乜係吾家官个國小同學，吾家官生活既經無法度自理、愛請外勞照顧，阿叔顛倒還會照顧餔娘，料理家務事，三個子女當早就「他鄉當故鄉」在外地發展咧哩！

這日，吾屋下阿蘭乜放尞無在屋下，𠊎陪家娘去市場逛，山精海戇看著麼个就想愛買，包尾買到歸菜籃車放毋落。

食飽晝，吾老公噦噦喊喊，又講愛去頭份，𠊎心肝愐：厥手再過癢咧，本成𠊎扡著（以為）天光日正轉台北个，結果舂舂忙忙又上路轉珊珠湖妹家。實在還尷尬！

等佢摸了十二圈後，暗晡9:00空仔結束，（在這其間，倈仔電話講，佢在台南吾老妹屋下，又在電話肚幾下到同吾老妹、老妹婿談哆綹麵線），等到10:00正上路，在林口放下細老弟，轉到台北11:00邊仔，無堵著塞車，一路順風。

這兩日，有意義？無嗒碓？隨佢去！日仔就又恁仔一日過一日。

今晡朝晨，正一開電腦，美國个六叔就skype來電，講佢兜在渡假中心。彩雲阿姑（吾家官个二姊）跈厥妹仔去美國尞，11/26到天光日總下43日，正愛轉來台灣。兩子哀逛遶大半隻美國，分𠊎歆羨。

哪央時𠊎正有這份閒情逸致暢樂遶尞呢？

▲BACK