勤於筆耕的客家文學創作者──張捷明先生專訪(2)

 

【文：徐碧美國立中央大學客家語文碩士班畢業生】

 

圖：張捷明與他的創作童書合影

提到對於客家文學的看法，以及在帶領客家文學寫作班的心得，張君認為：

一般人對到底麼个係客家文學、客語文學，有當多種个看法，這方面前輩論述既經當多，盡早有人講，客家籍作家个作品就係客家文學，這點現下應該無人再採用，現下較有共識个講法係，無論使用麼个文字，只愛作品以文學性筆法表現客家議題為中心，牽涉文化、感情、歷史、地域、語言……都算客家文學，至於客語文學就更加嚴格，一定愛使用純客語文字寫成个文學作品正算，雖然當多人認為客家文學就好，毋過我還係鼓勵真正用純客語文創作个客語文學。當然，我這兜个文學寫作班，在寫作理論个教學上，還係會多方面從不同語族中尋師資摎教材，多方學習，這乜係有人誤解我兜無追求客語文學个所在。毋過，經過觀察，這兜學員這兩年煞猛寫，既經寫出真多作品，還參與盡多个客語文學獎喔。

現下客家族群分布在社會各種無共樣个地域摎層面上，面對種種客家議題摎母語困境个體會程度，自然就各各毋共樣，對客語母語復興進程个方法，摎到底語言、文字、文化、文學，愛認同到麼个程度乜各有看法，毋過我試著，只愛每一人從自家現有个基礎上日日各進一步，日久就會有成果──毋知自家係客家人个尋轉自家个身分、無客家自信个拈轉客家自信、毋曉聽客个開始學聽客、毋曉講客个開始學講客、只會講幾句个毋使驚生就拿出來用、毋敢開嘴講客个開始練膽，第一句第二句一句一句打開心結、會講客个再進一步研究自家个文化歷史、通曉族群个除忒踏入學術研究、乜開始接觸文學欣賞摎創作、分客家藉由文學日日新，藉由文學發覺人心人性，也使得客家學術研究，除忒無變个頭擺，產生新个研究方向、新个題材、新个想像。

 

7

那麼，在客語寫作班，張君都教授些什麼呢？張君接著說：
我毋係師範科班出生个學校先生，我單淨係想教恩裡个細人仔講客个母語支援先生定定，乜識取得文學摎語言兩樣客語薪傳師資格，現下係桃園縣客家語教師協會理事長。從教學角度來講，其實我較偏向客語文學个欣賞，毋過大家就知，現下細人仔个客語能力普遍無好，愛教文學，免毋忒愛先教客語摎客語文字，並先認識客家文化等等，故所還係愛一步一步來，學校教學時數本旦就毋la，故所一切教學个手段還係以生趣為主，恩裡客話「學校學校」嘛，毋就係「學搞學搞」，搞中學就著矣啦。

文學、文化、文字摎語言个教學本旦係無共樣个，毋過，一般先生還係淨教語言摎文字認識，或者生活會話、諺語、師傅話等等，就算教著文學作品乜往往從用字為重點，這係愛漸漸改進个。好得大多幼兒班、低年級班還係有從兒歌、童謠教起，還係盡有用，真生趣啦。另外每擺比賽選出來參加比賽演講朗讀个選手，一般多少抑會接觸教育部準備个文學作品，乜真好啦，係總下所有个學生仔都共下學就盡好，就算打冇嘴乜好。

我還係鼓勵客語先生多選讀生趣又有意思个文學作品，分細人仔在課堂上教个片語會話，有一個情境演練實習个機會，因為這種想法，故所我從會十過兩十年前起勢，就開始創作一系列个兒少文學，到目前有十二本客家少年文學，包含童詩、童話、繪本、讀本、小品等等。我創作新个客語兒少學有一個原則，除忒生趣、有客家成分，還盡量毋好違反現代教育个精神，乜毋好違反現代个知識摎科學辯證。

▲BACK