幸福美滿

【文／陳淑芳（現任客語老師／臺北市民生國中退休的國文老師）】

 

「人生盡頭全係夢，明日黃花蝶也愁」。

    昨晡下晝參加同學老公追思禮拜，典禮結束哩，還在車牌等公車，吂轉到屋下，接著一個好朋友个電話，講佢朝晨乜共樣來這中山區林森北路个基督長老教會，參加厥打鼓樂隊个一位團員老公个「人生个謝幕」。

    到這年紀，既經開始會思考自家个生死問題。
這好友電話裡肚同「控訴」厥老公个毋傪人个行踏，聽哩當為吾朋友抱不平。毋過，也愐毋解兩公婆共下生活咧四十空年，有麼个冤仇結到恁深呢？

    顛倒貶轉來講，係一開始結公婆个時節，兩儕就做得同心協力為自家个新生活打拚，也學習欣賞對方、尊重、了解、照顧、責任，曉得用心學習「愛个藝術」，仰般到這滿雙雙退休咧，生活歸下無牽掛、無愁慮，還愛來冤家羅債互相博激呢？這央時就斷真係兩儕最適當談情講愛个時節，你講係毋係啊？何嫲死苦引挖對方个罪狀，恁樣兩人共下生活在一個屋簷下，日日氣噴噴仔，你看佢無順眼，佢看你敢有鬆爽？

    同學个老公，前年五月正退休，兩個月後就入院治療大腸癌，包尾還係對抗不了閻羅大王个邀請帖，今年2013/1/13蒙主寵召，訃聞頂高，同學恁仔講：
「一生六十二載，總係一派簡樸恬淡，
不戚戚於貧賤，不汲汲於富貴，毋摎人爭利，不計較得失；
面對厥个離開，俚有千般不捨嗄勿傷悲，
因為佢單淨走忒咧厥分內个路，先一步行到主个胸前，
俚最尾會在天家重逢。
佢最歡喜出國遶尞，相信佢定著在神个旁脣看等地泥項个美景。」
雖然，同學講「邀請您用喜樂歡喜心共下來參與吾丈夫人生个謝幕」，
毋過，坐在後背，目汁毋知流忒幾多？

也愐想著吾爸已過身四十空年咧（1972.7.13）。
阿爸个身影——永遠係一位武頓車槌个中年紳士，著等白襯衫摎青卡其工作制服長褲，歸口白淨白淨个牙齒，難得聽著个朗朗笑聲……毋敢再過愐下去哩，吾喉嗹空又肅緪起來，心焦想愛噭喲。
故所，人間最真善美个就係親情。公婆和捼，自然家庭氣氛美滿，子女就蒙受幸福。謹祝
親愛个親朋好友 全家幸福美滿

▲BACK