從人種講到語種

【文／范文芳教授（國立新竹教育大學）】

 

從人種講到語種        客家語言文化第一講          2014/3/5

 

一  話頭

客話，又稱客家話，簡單講，就係客家裡種人講个話，另外一種講法，也做得講客家裡種人種習慣講个語言，就安做客家話。

 

係用現代科學个角度來看，人種在地球上出現，經過幾百萬年个遷徙、生養、演化，其生理結構、心理言行、生存方式都會隨時隨處做調適、修正、創新，當然也有盡多物種滅絕，當多物種新生。

 

21世紀，生養在台灣个客家人，佢兜還時常慣習講个客語，包含五、六種大同小異个腔調，假使用科學方法去追尋其源頭，該就有需要花費當多時間，慢慢來從頭講起囉。

 

二  先從人種講起

1.         地球个歷史

從現代科學，包含物理、天文、氣象、岩石、化學、生物、遺傳等等學理做研究，可推測，宇宙間出現地球，至少係在40億年前，有水、空氣、日頭光个幫忙，地球上開始出現微生物，已經係35億年前个事情了。

2.         生物个歷史

從單細胞微生物，演化出多細胞生物，又已經過了30億年，在生物學个分類方法上，生物界產生於無生物界，生物界再衍生出植物摎動物，動物界再細分為幾種門，門之下再分幾種綱，綱之下再細分幾種目，目之下再分科、屬、種，簡單講，客家人个祖源，用現代生物學个角度來講，係生物界、脊椎動物門、哺乳動物綱、靈長目、猿人科、人屬，人屬又經過巧人、智人、現代人，現代人也因為遷徙、通婚、認養再演化為烏人、白種人、黃種人、紅人。

3.         人種个歷史

現代人類社會，又因政治、交通、職業、傳播、教育、法律个多方面影響，愛界定麼人係客家人，已經無簡單，姓氏、籍貫、膚色、骨架、衫褲、食物、屋舍、職業、國籍全部做毋得做為單一个依據。

4.         台灣客家人个祖先

係用生物學參考考古學、人類學、社會學、語言學个方法，做得講---台灣客家人个祖先，四百年前來自亞洲東南，一千年前生活在黃河長江之間，幾萬年前生活在中亞，幾十萬年前從非洲遷徙出來。

三   人類語言个形成、遷徙、演變、分支

1.         從解剖學、考古學个角度來講、大腦容量倍增、喉嗹往下移、雙腳直立奔走、製造工具使用，係人類演化史上重要个關鍵，大量在非洲出土个骨骼，可證明在百萬年前，人類已逐步揮別猿人，步上巧人、智人、現代人个不歸路。

2.         人類在社會生活上有需要更加詳細个溝通，經過長時間个約定成俗，發展出一套語意、語音、語法結構緊密个語言，所有人類个語言全係地區方言，各種方言又會隨著居民个遷徙、生活方式改變進行改變。

3.         語言學家根據語音、辭彙、語法系統，整理出世上千百種方言，仿照生物學个分類，先大分為印歐、漢藏、南太平洋、、、等語系，又稱語言家族[family]，台灣个客家語在語言學个分類上，係漢藏語系下个方言，新竹、苗栗、東勢、崙背、美濃、屏東等地通行个客家話，在學術上稱為客話次方言。

 

四   結論

1.         各種生物都有各自个語言，人類个語言發展到非常複雜、詳細、有效，都有嚴謹个音節、辭彙、句法結構，有兜語言已經發展出精細个書寫文字，台灣个客家話具備裡兜條件。

2.         台灣客家人个祖先，可以從自家个父母、阿公、阿婆、姊公、姊婆、、、來台祖、再往上追溯到苗、傜、畬、漢、滿、蒙、、、再往上追溯到非洲猿人、、、

 

延伸閱讀

     1  繽紛的語言學    Matthews P.H.原著  2003牛津大學出版  戚焱譯   中國南京 譯林出版社2008

 

     2  人類傳奇         Richard Leakey 原著  1994出版  許玉齡譯 台灣台北 天下文化出版1995

 

     3  語言的歷史       Steven Roger Fischer 原著 2000倫敦出版 陳萱芳、吳昭芬合譯 台灣台北 商周出版 2009         

 

                            

▲BACK