羊屎烏

【文／范文芳教授（國立新竹教育大學）】

 

羊屎烏，係客家詞彙，其所指稱，係一種高大个喬木，拉丁學名係Elaeocarpus decipiens Hemsl﹒中文譯名杜英，1935年，台灣山林會調查編寫个《台灣主要樹木方言集》，歸入膽八樹科，家族內有薯豆、海木羨仔、杜英、猴歡喜、牛屎烏等Hoklo名，也有Taiyan名 dan，經過我長久个查訪，根據其樹形、樹葉、開花、打子以及用途，我做得確定，裏種樹木，客家人稱其羊屎烏，其名號後背个語意，係講樹籽成熟以後，形狀、大細、顏色盡像暗色个羊屎。

 

半世紀以前，莊下个細人仔，會跋上羊屎烏樹去大力搖樹掗，無就用棍仔去敲打羊屎烏樹枝，撿起跌落地泥个烏綠色樹籽，裏種果子个大細，差不多像尖核台灣橄欖个一半大，又像後來從印度洋引進个圓核錫蘭橄欖个三分之一大。講到其味道，就生食來講，果肉个味道，雖然全都有酸、澀、甘三種味緒，我個人个感覺，還係羊屎烏比較好食。

 

講了細人仔个羊屎烏，也愛提起大人个羊屎烏，早年用農耕山林為主个客家人同原住民，全部會選取楓樹、柯樹同羊屎烏，做為人工種植香菇个樹材。不過，必須將高大个樹木，鋸倒下來，再過鋸做五、六尺長个一截截樹材，將買轉來个菇菌，像注大筒射樣，注入事先挖好个細空窟肚，民間慣時稱其香菇柴。

 

在新竹縣新埔往湖口个幾條山窩，其中有一條安做羊屎烏窩，客家先民根據該條山窩，原旦就歸片羊屎烏樹，故所安名羊屎烏窩，遇著讀過漢字个秀才，一來不知該係樹名，二來認為講到屎尿，總係俗八八，就誤解做羊屎當多个山窩，，實在冤枉，早年个客家先民，有畜牛、豬、鹿，就盡少畜羊仔。到尾來，性好牽強附會个識字人，又將羊屎改做羊喜，又從羊喜改做祥喜，緊改緊吉祥歡喜，中了漢文化个遺毒，遂背叛了台灣客家先民个祖宗聲、祖宗言。

 

在二000年个夏初，我從南庄山頂移植轉來个一叢羊屎烏樹苗，如今已經高過我屋下个三棧樓，不知係城市肚只此一叢，無法完成兩性生殖麼?見擺看其在五、六月間，開著滿樹个穗狀白花，就無福食著其秋來結成个羊屎烏。五月下旬，因為特密个枝葉，遮著我二樓書房个自然光，六十零歲个老家伙，爬上樹去修剪，不記得裏種樹枝當脆，一下不都好，跌下來，好得命靚，竟然受著皮肉小傷，撿轉一條老命。

                            

▲BACK