客家後生个心事

【文／邱建綸 (臺北市立大學中國語文學系博士生)】

 

        做一个歇在臺灣个客人，正經無簡單。做一个歇在臺灣个後生客人，還較無簡單。

 

　　自細細个時節開始，屋下个大人，連阿公阿婆都會摎你講，愛講「國語」，下二擺去學校正毋會分先生罰。故所到國小畢業，你講著盡正个客話係「食飯」。你聽得識大人在講麼个，大約揣仔著大人个意思，毋過換到你想問較詳細个時節，該兜大人又會同你講：「細人仔讀好若个書就好，問恁多做麼？」這時節你在學校裡肚讀个書，全係教「國語」个。到「鄉土語言」開始在國小教个時節，你既經高中、大學，國語講著仰般無標準，還係比若客話正較多。假使好彩，有機會接觸到像客語認證這息仔東西，你無定著做得學會仰仔用客家字寫你頭擺聽過个客話。過忒，你無分客家字驚走，跈等去參加人講「客家界」辦个活動，你又會看著當多大哥大姐、叔伯舅姆不時在「教」人。佢兜分享盡多人生个經驗係無差，乜愛聽个人奈得何正好。等到學著差毋多，對客家字、客家事有一息仔盡淺盡淺个了解之後，若个大問題正愛來：讀忒恁多同客家有關个書，到底做得拿來做麼个？

 

　　在屋下，同阿爸阿姆講客話个機會既經無當多，一下想著國語裡肚个詞，問愛仰仔講客，阿爸阿姆無定著全毋知。假使想問老頭擺个客話有麼个，阿公阿婆該片問起來乜亦辛苦，因為講著這下無个東西，想看等來了解乜無機會。認真講，做麼會有這種問題，盡尾還係時代同頭擺毋共樣，講客个人大部分自做田事來，客話个內容自然離不開鄉下庄頭个東西。留到現下還合用个客話，定著係慢慢減少，無添兜新个字詞係做毋得个。都市項个生活，摎進前慣講个客話愛仰仔放共下，這頭路係講客个後生人閃毋開个問題。

 

　　另外一个大問題係：你愛同哪儕人講客？摎福佬人該種不管堵著麼个人都堅持講福佬个精神比起來，客家人大概都係同熟絡个人正較有在講客。用客話交著新朋友个機會在這種環境下又還較少，尤其係共一輩个後生人，路項隨在拉著一儕就做得用客打嘴鼓，該機會實在忒低忒低了！

 

　　頭前恁多問題，換隻話講，實在就係客話到越細个人身頂，越難準同朋友打嘴鼓个工具用。係恁樣个話，愛後生人仰般「深耕」、學習客話？跈等來个問題，就係認同个問題。今晡日後生人知自家係客人，無定著還會聽、會講一息客話，毋過佢對客家个事務，對客家話堵著个問題，毋會有正式个感覺。

 

 

　　這問題有幾嚴重？一个保護三義石虎个活動，無到兩日就做得尋著三百零儕人到現場去關心。同客家人个媒體權盡相關，盡重要个客家電視台堵著問題，連廣告超過三日正有三百儕去「連署」。

 

　　試想，做一个歇在臺灣个後生客人，看著這種事情發生，愛仰般做正好？

 

 

                            

▲BACK