【文╱黃文斌 (國立中央大學客家語文研究所研二生)】
今年七月避暑開始，就去東馬來西亞个沙巴州，作基本个客家語言調查，希望多了解當地客家人一百三十零年來，徏到當地个故事，行過將佢兜个客家口音僇台灣客家話差別个程度，作比較一下。
肓去以前，有兜愁慮毋知會順利嚒？尋兜資料打電話連絡該下，該邊个鄉親嚇到一下，仰會有不識个客家人會去尋佢？去个目的做嬷个？到沙巴首府亞庇以後，聯絡到一位頭擺在拿篤巿(Lahad Datu)做過華文中學董事長个羅先生協助。佢講去拿篤做調查，佢會喊佢吔倈仔幫忙，因為佢吔倈仔哩下嘛接做該箇中學个董事長。佢吔大、小倈仔全係從台灣大學畢業，非常熱情又肯幫忙。佢又紹介一位退休校長僇一位記者來協助涯做語言調查工作。佢兜聽道涯係台灣來吔，斯對涯特別好，使涯實在感心五內，無以回報。
七月底又陪涯个倈仔騎腳踏車，環繞半個台灣，從屏東、台東、花蓮，騎到宜蘭个羅東。一路上看到異多非常靚个風景僇各種活動之外，又堵到異多个客家人，佢兜對涯兩儕盡熱情，尤其係原來從新竹二次移民徏過去个長者，聽到共樣講海陸客話，特別有感情。比喻講，騎到花蓮鳳林該下，係暗哺頭八點零累，食夜以後，要尋歇夜个位所，僇添加冷滾水。後來聽到路唇幾個老阿伯打嘴鼓，就借問佢兜，結果其中一儕就講佢屋下有盡多山泉水煮个冷滾水，免費送分涯兜，另一儕就度涯去附近个旅社。旅社个頭家聽到新竹來个客家人，有分涯兜優待呢！ 第二日，要出發以前，涯再去僇佢兜表達承蒙之意。
本想一路經過蘇花公路騎到宜蘭，結果半路上後輪漏氣，補好再騎一段又爆胎。實在没辦法之下，向路過个大、小貨車揮手求救，經過半點零鐘，没一輛停下來相救。將將天快暗了，萬般無奈之下，看到有遊覽車到附近一家休息站停陀，借問做得幫忙嚒？一聽口音是客家海陸腔，再問竟是涯新竹關西个鄉親，馬上喊涯將車仔拉上車，又免費載到蘇澳修理，實在承蒙洌兜鄉親協助。
一路上，涯就僇倈仔講學客家話个重要性僇好處，經過這兜事情後，佢就知多學一種母語有盡多个用處，下擺佢愛好好來學客家話。還教佢長大以後，係有機會僇能力該下，愛盡量幫忙別儕正好，恁樣人生正有意義，生命正有價值。
