【文／賴振員 (國立中央大學客家語文研究所研二生)】
客家山歌个本質，分人个印象係易低俗，還過帶兜色樣。比論講像桃花開、十八摸、初朝歌‥等，乍聽之下有兜風流放蕩，有違善良風俗个感覺。其實不盡然，客家族群崇尚忠孝節義，講信修睦，重視倫理道德，如果真係按樣下流，客家山歌早就攉嘍，哪還會流傳至今？再過講，客家山歌確實係根據唐詩演變來个，摎唐詩有密切个關係，由於無係本文个主題，故不在此詳述。客家山歌，除了表現出男女之間个愛情，其真情流露，耐人尋味；其大膽个風格，令人靦腆，千萬不可用色眼看待。客家山歌最主要特色係接常用到雙關語摎比喻。
雙關語例如：
錫打禁指金包皮，一心打來送分妳，實言實語同妹講，心中有錫妹無知。
這首典型个雙關語山歌，妙在於借用「錫」同「惜」个諧音，一語雙關。「金包皮」點出單淨外表鍍金个禁指，「一心打來送分妳」按樣个真心。「心中有錫」表示「心中有惜」个無限情意。
又如：
新做茶罐錫摎鉛，哥講錫來妹講鉛，妹講鉛來哥講錫，總愛有錫正有鉛。
同樣係藉用「錫」同「惜」；「鉛」同「緣」个諧音，一語雙關，和上首有異曲同工之妙。
比喻語例如：
想起連妹實在難，可比鯉魚上急灘，水清又驚人看到，水汶又怕網來攔。
這條係用鯉魚上急灘作為比喻對象，來描寫情侶在談戀愛時該種思念个心情，水清（比喻明處）驚分別人來看著，分人取笑，但是水汶（比喻暗處）時，雖然較毋會分人看著，但係，盡驚分人來當面捉著。
又如：
入山看著藤纏樹，下山看著樹纏藤，藤生樹死纏到死，樹生藤死死也纏。
用「藤纏樹」，「樹纏藤」來比喻男女个情愛如樹、藤纏綿難分，表現出至死不渝个堅貞愛情，描述得淋漓盡至，感人肺腑。
客家山歌之所以，做得流傳至今，歷久彌新，常有新歌詞的創作出現，並成為客家族群茶餘飯後，旅行慶典个餘興節目，實在係有志之士大儕家不斷鑽研个結果。希望將來客語所出來个學生，除了作學術以外，也會唱幾條个山歌，使客家文學摎民間歌謠永遠流傳下來。
